काठमाडौं,६ मंसिर । अर्थमन्त्री डा.प्रकाशशरण महतले बैंकबाट ऋण लिएर ऋण नतिर्नेहरुलाई राज्यले नछोड्ने बताउनुभएको छ ।
मंगलवार अर्थतन्त्रका वर्तमान समस्या र समाधानबारे प्रधानमन्त्री तथा मन्त्रीपरिषद्को कार्यालयमा सरकार, राजनीतिक दल, निजी क्षेत्र र सरोकारवालाहरुसँगको छलफलपछि यस्तो बताउनुभएको हो । उहाँले ऋण लिएर ऋण नतिर्नेहरुको सुनुवाई राज्यबाट नहुने बताउनु भयो । उहाँले अफ्ठ्यारोमा परेकाहरुलाई भने सरकारले केही समय उपलब्ध गराउने बताउनु भयो ।
उहाँले भन्नुभयो, ‘साना उद्योग व्यवसायलाई प्रमोट गर्ने क्षेत्रमा पनि अझ तदारुकताका साथ काम गर्ने निस्कर्ष निस्कियो । जो साँच्चिकै समस्यामा छन्, उनीहरुलाई सरकार र राष्ट्रबैंकको तर्फबाट सहजीकरण गर्ने भन्नेकुरा आएको छ ।
तर ऋणको सवालमा ऋण लिएर पैस लिएर तिर्दै तिर्दिन भनेर जो लाग्छ, त्यसको सुनुवाई हुँदैन, त्यो तिर्नैपर्छ । जो अफ्ठ्यारोमा छ, त्यसमा समय दिने सहजीकरण गर्ने भन्नेकुरामा सरकार प्रतिवद्ध छ । उही ऋण लिने र उही ठूलो पल्टिने कुरालाई राज्यले सहन सक्दैन ।’
