काठमाडौं, २३ फागुन । नेपाली बजारमा सुनको मूल्य हालसम्मकै सबैभन्दा उच्च बिन्दुमा पुगेको छ । सुनको मूल्य लगातार बढेर दैनिक नयाँ रेकर्ड कायम गर्न थालेको छ ।
शुक्रवार सुनको मूल्य तोलामा १ हजार ८ सय रुपैँयाले बढेर नयाँ कीर्तिमान कायम गरेको छ । नेपाल सुनचाँदी व्यावसायी महासंघका अनुसार शुक्रवार छापावाला सुनको मूल्य प्रतितोला ८२ हजार ५ सय रुपैयाँमा कारोवार भएको छ ।
त्यस्तै तेजावी सुनको मूल्य प्रतितोला ८२ हजार २ सयमा कारोबार भएको छ । बिहीवार छापावाला सुनको मूल्य प्रतितोला ८० हजार ७ सय मा कारोबार भएको थियो ।
बिहीवारको तुलनामा सुनको मूल्य तोलामा १ हजार ८ सयले बढेको हो । भारतीय रुपैँयाको तुलनामा अमेरिकी डलर महँगो हुँदा सुनको मूल्य बढेको महासंघले जनाएको छ ।
त्यसैगरी चीनको वुहान प्राप्तबाट फैलिएको कोरोना भाइरसले बिश्वव्यापी रुप लिएपछि त्यसले बिश्व अर्थतन्त्रमा प्रभाव पारेकोले सुनको भाउ बढेको बिश्लेषको भनाई छ ।
