काठमाडौं, २७ पुस । प्रिमियर लिग फुटबलमा लिभरपुलले १६ अंकको अग्रता कायम गरेको छ ।
शनिबार राति टोटनह्यामलाई १–० गोल अन्तरले पराजित गर्दै लिभरपुलले दोस्रो स्थानको लेस्टर सिटीसंग १६ अंकको अग्रता लिएको हो । पहिलो हाफको ३७ औं मिनेटमा फिर्मिन्होले गोल गर्दै लिभरपुललाई महत्वपुर्ण ३ अंक दिलाए । लिभरपुलले युरोपका शीर्ष पाँच लिग मध्य सबै भन्दा उत्कृष्ट सिजनको सुरुवात गर्ने कीर्तिमान कायम गर्यो ।
उसले लिगका सुरुवाती २१ खेलमध्ये २० खेलमा जित हासिल गरेको छ । जितसंगै लिभरपुल पछिल्लो ३० बर्षमा पहिलो पटक उपाधि होडमा निकै सहज अवस्थामा आईपुगेको छ । शीर्ष स्थानको लिभरपुलको २१ खेलबाट ६१ अंक छ । टोटनह्याम ३० अंक सहित आठौं स्थानमा छ ।
