एजेन्सी, ५ पुस । सरकारले नयाँ नागरिकता कानुनमा मुस्लिम लगायत समुदायलाई विभेद गरेको भन्दै चर्किएको प्रदर्शनका क्रममा प्रहरीको धरपकडबाट भारतमा २० जनाको मृत्यु भएको छ भने सयौं जना घाइते भएका छन् ।
प्रदर्शन हिंसात्मक बनेपछि प्रधानमन्त्री मोदीले शनिबार मन्त्रीहरुसंग छलफल गरेको भारतीय संचार माध्यमहरुले बताएका छन् ।
भारतको नयाँदिल्ली, उत्तरप्रदेशका मुजफ्फरपुर, मेरठ, गोरखपुर, बनारस लगायतका ठाउँमा प्रदर्शन चर्किएको छ । सरकारले प्रदर्शन गर्न रोक लगाए पनि नागरिकको विरोध प्रदर्शन कायमै छ ।
प्रहरीको निषेधाज्ञा तोड्दै हजारौ नागरिक सडकमा निस्किएर प्रदर्शन गरिरहेका छन् । राजधानी दिल्लीमा विद्यालय र कलेज बन्द गरी विद्यार्थीहरुले समेत प्रदर्शन जारी राखेका छन् ।