काठमाडौं, ३० मंसिर । त्रिभुवन आर्मी क्लबले सहिद स्मारक ’ए’ डिभिजन लिग फुटबलमा विजयी सुरुवात गरेको छ । सातदोबाटोस्थित एन्फा कम्प्लेक्समा सोमबार भएको खेलमा फ्रेन्ड्स क्लबलाई २–१ गोल अन्तरले पराजित गर्दै आर्मीले विजयी सुरुवात गरेको हो ।
आर्मीलाई जित दिलाउन नवयुग श्रेष्ठ र दिनेश हेम्जनले एक एक गोल गरे । आर्मीले खेलको तेस्रो मिनेटमै नवयुगको गोलबाट अग्रता बनाएको थियो ।
खेलको ५० औं मिनेटमा शक्ति राईले गोल गर्दै फ्रेन्ड्सलाई खेलमा फर्काए । तर, ८१ औं मिनेटमा दिनेशले गोल गर्दै आर्मीलाई २–१ को जित दिलाए । जितसँगै आर्मीले ३ अंक जोडेको छ ।
