एजेन्सी, २९ असार । कीर्तिमानको यात्रामा रहेकी अमेरिकी सेरेना विलियम्सलाई रोक्दै सिमोना हालेपले विम्बल्डन टेनिसमा महिला एकल तर्फको उपाधि जितेकी छन् ।
रोमानियाकी हालेपले पहिलो पटक विम्बल्डनको उपाधि उचालेकी हुन् । हालेपले विलियम्सलाई ६–२ र ६–२ को सेटमा पराजित गरेकी हुन् । २४ औँ ग्राण्डसलाम उपाधि जित्ने लक्ष्यमा रहेकी विलियम्सलाई पराजित गर्न हालेपलाई मात्रै ५६ मिनेट लाग्यो । २७ वर्षकी हालेपले विलियम्स विरुद्धको आफ्नो खेल उत्कृष्ट रहेको बताएकी छन् । उनले आफ्नो खेल जीवनमा दोस्रो ग्राण्डसलाम उपाधि जितेकी हुन् । यसअघि उनले सन् २०१८ मा फ्रेन्च ओपन टेनिसको उपाधि जितेकी थिइन् । ३७ वर्षकी विलियम्स पछिल्लो १२ महिनामा प्रमुख टेनिस प्रतिस्पर्धाको फाइनलमा पराजित भएको यो तेस्रो पटक हो ।
