संसद्कै हालत यस्तो !! | ईमाउण्टेन समाचार

Our Network

चैत १६ २०८०, शुक्रबार

संसद्कै हालत यस्तो !!

samsad ko halat

काठमाडौं, २ चैत । राष्ट्रियसभाको दिगो विकास तथा सुशासन समिति शुक्रबार मध्याह्न अनुगमनमा निस्कियो। सरकारी निकायको ‘सुशासन अवस्था’ हेर्नु उसको जिम्मेवारी हो। पहिलो अनुगमन संसद् सचिवालयबाटै गर्ने तय भयो।

छड्केमा निस्किएका समिति सदस्यहरू सिंहदरबारस्थित पुरानो संसद् भवनतर्फ लागे। भूकम्पले मक्किएको ऐतिहासिक संसद् भवन सञ्चालनमा नरहेकाले ताल्चा लगाइएको थियो। पहिलो संविधानसभाको बैठक नयाँ बानेश्वरमा रहेको अन्तर्राष्ट्रिय सम्मेलन केन्द्रमा बसेपछि यो भवन बन्द थियो। तर त्यसको जगेर्नामा कसैको ध्यान गएन। २०७२ को भूकम्पले त यो ऐतिहासिक भवन थला पर्‍यो।

लामो समयदेखि बन्द रहेको संसद् भवन प्रवेशमा रोक लगाइएको छ। सांसदहरू संसद् सचिवालयलाई जानकारी नदिई छड्के अनुगमनमा गएकाले त्यसको ढोका खोल्ने कर्मचारीसमेत थिएनन्। ‘आग्रह गरेर कर्मचारीलाई बोलायौं। सुरुमा त उनी ढोका खोल्नै अनकनाए’, समाजवादी फोरमकी सांसद प्रमिला कुमारीले भनिन्, ‘भित्र छिर्दा पत्याउनै सकिएन, यो त्यही संसद् भवन हो जो नेपालको संसदीय इतिहासको धरोधर हो ? ’

भवनभित्र संसद् सचिवालयले प्रयोग गरेका सामान भद्रगोल थिए। भुइँतलामा पुराना साइकल, टुटेफुटेका सामान र काठका टुक्रा असरल्ल थिए। त्यहाँ पुराना कम्प्युटर, ल्यापटप, प्रिन्टर, फर्निचरका सामग्रीको चाङै थियो। ‘त्यहाँको दृश्य हेर्दा यो त संसद् भवन नभई डम्पिङ साइटजस्तै लाग्थ्यो’, नेकपा सांसद दिनानाथ शर्माले भने, ‘सय वर्ष पुरानो भवनको दुरवस्था देखेर मन रोयो। संसद् सचिवालयको चरम लापरबाही त्यहाँ प्रस्ट देखिन्थ्यो।’ ग्यालरी बैठक भुइँतलामा थन्क्याइएका फर्निचरका सामग्री र इलेक्ट्रिक सामानले भरिभराउ थिए।

कामै नलाग्ने सामान मात्र होइन कि सामान्य मर्मत गरेर पनि प्रयोगमा ल्याउन सकिने सामग्री बेवारिसे रूपमा संसद् भवनभित्र फालिएका थिए। ‘राज्यको सम्पत्तिको ठूलो दुरुपयोग भएको हामीले पायौं’, शर्माले अन्नपूर्णसँग भने, ‘अलिकति बिग्रियो कि गोदाममा थन्काइदिहाल्ने प्रचलन लामो समयदेखिको रहेछ।’

सोफा, दराज, र्‍याक, कुर्सी, कम्प्युटर, प्रिन्टर, ल्यापटप, कार्पेटलगायत सामानले भरिएको छ, पुरानो संसद् भवन। ‘लाखौं रुपैयाँ पर्ने सामान कबाडीजस्तै फालिएका छन्। तिनीहरुको मर्मत र प्रयोगमा सचिवालयले चासो नदिइएको पाइयो,’ सांसद कुमारीले भनिन्, ‘एकदम नयाँ देखिने कुर्सी, सोफासेट र कार्पेट पनि फालिएका छन्।’

यो खबर आजको अन्नपूर्ण पोस्टमा प्रकाशित छ ।

(function ($) { $(function () { $('#announcementModal').modal('show'); }) })(jQuery);