चितवन, २० माघ । धुर्मुस–सुन्तली फाउण्डेशनले चितवनको भरतपुरमा गौतम बुद्ध अन्तर्राष्ट्रिय क्रिकेट रंगशाला निर्माणको काम सुरु गरेको छ । चितवनको भरतपुरमा सो रंगशाला निर्माण स्थलमा आइतबार एक कार्यक्रमको आयोजना गरि फाउन्डेशनका अध्यक्ष सिताराम कट्टेल ‘धुर्मश’ र उपाध्यक्ष कुञ्जना घिमिरे ‘सुन्तली’ले संयुक्त रुपमा डोजर चलाएर सो रंगशाला निर्माण कार्यको शुभारम्भ गरे ।
कार्यक्रममा बोल्दै फाउण्डेशनका अध्यक्ष एवंम् चर्चित हास्य कलाकार सिताराम कट्टेल (धुुर्मुुस) ले सो रंगशाला निर्माणको काम तोकिएको समयभन्दा अघि नै सम्पन्न गर्ने प्रतिवद्धता व्यक्त गरे । उनले आफूहरु अनुभवी पनि भएकाले सो रंगशाला निर्माणमा ढिलाई नहुने बताए । सो रंगशाला निर्माणका लागि गुरुयोजना बनाउने काम सुरु भईसकेको अध्यक्ष कट्टलले जानकारी दिए ।
अध्यक्ष कट्टेलले सो आयोजना इमान्दारिताका साथ निर्माण गर्ने बाचा गरे । उनले धेरै स्वमयसेवक परिचालन गरेर सो रंगशाला निर्माण कार्य सम्पन्न गर्ने भएकाले त्यसको लागत ३ अरव लाग्ने अनुमान गरिएको बताए । नेपाललाई खेलकुदको हर्वको रुपमा विकास गर्ने योजनाका साथ सो रंगशाला निर्माण कार्यमा आफूहरु जुटेको पनि फाउन्डेशनले जनाएको छ ।
कार्यक्रममा बोल्दै फाउन्डेशनकी उपाध्यक्ष कुञ्जना घिमिरे ‘सुन्तली’ले देशको मुहारमा खुशीयाली ल्याउन सो रंगशाला निर्माणको कामको जिम्मा लिएको बताइन् । उनले देश र आफ्ना बाबुआमा खुशी बनाउने काम सबैभन्दा बढि खुसीको कुरा भएकाले आफूहरुले पनि देशलाई खुसी बनाउन सो रंगशाला निर्माणको काम सुरु गरिएको स्पष्ट पारिन् ।
२० बिगाहा ८ कट्ठामा जग्गामा निर्माण सुरु गरिएको सो अन्तर्राष्ट्रिय क्रिकेट रंगशालाको लागत ३ अरव अनुमान गरिएको छ । गत माघ १६ गते फाउन्डेशन र भरतपुर महानगरपालिकाबीच सो रंगशाला २ वर्ष भित्र निर्माण सम्पन्न गरिसक्ने गरी सम्झौता भएको थियो ।
कार्यक्रममा प्रधानमन्त्री केपी शर्मा ओलीले सो रंगशाला निर्माणको लागि सरकारले पनि सक्दो सहयोग गर्ने प्रतिवद्धता जनाएका थिए ।
