काठमाडौं, ५ असोज । प्रतिनिधिसभा कानुन, न्याय तथा मानव अधिकार समितिको सभापतिमा कृष्णभक्त पोखरेल निर्विरोध निर्वाचित भएका छन् ।
समितिको शुक्रबार सिंहदरबारमा बसेको बैठकले एक मात्रै उम्मेदवारी परेका पोखरेललाई समितिको सभापतिमा निर्विरोध चयन गरेको हो । नवनिर्वाचित सभापति पोखरेलले राष्ट्रहितमा कानुन निर्माण गर्ने साझा उद्देश्य प्राप्तीमा लागिपर्ने प्रतिवद्धता व्यक्त गरे ।
उनले संघीय संसदको विषयगत समितिमा सत्तापक्ष र प्रतिपक्ष नहुने भन्दै सोही अनुसार अघि बढ्ने योजना पनि अघि सारे । सरकारको कामको अनुगमन, मूल्यांकन र आवश्यक निर्देशन दिने कामलाई पनि आफूले जोड दिने नवनिर्वाचित सभापति पोखरेलको भनाई छ । नवनिर्वाचित सभापति पोखरेल सत्तारुढ नेपाल कम्युनिष्ट पार्टी (नेकपा) का सांसद हुन्।
