चितवन, ३ असोज । भरतपुर अस्पतालमा सुत्केरी वार्डमा आवश्यक पूर्वाधार नहुँदा सुत्केरी र नवजात शिशुहरुको भुइँमै उपचार भैरहेको छ । अस्पतालमा रहेको पचास शैयाले अपुग भएपछि सुत्केरी र नवजात शिशुको भुइँमै उपचार भईरहेको हो ।
भुइँमा पनि सुत्केरीको संख्या खचाखच भएपछि अहिले अवस्था झनै समस्या भएको छ । साथै नवजात शिशुहरु समेत जन्मने बित्तिकै भुइँमा सुत्न बाध्य भएको चिकित्सकहरुले बताएका छन् ।
चितवनमा ९० प्रतिशत सुत्केरी भरतपुर अस्पताल उपचार हुने गरेको छ । भरतपुर अस्पतालमा आर्थिक वर्ष ०७४-०७५ मा १३ हजार ५ सय २५ जनाले सुत्केरी सेवा लिएका छन् । पछिल्लो समय भरतपुर अस्पतालमा वार्षिक ८ सयको औशतमा सुत्केरी सेवा लिनेको संख्या रहेको अस्पताल स्रोतले जनाएको छ ।
