काठमाडौं, २९ साउन । प्रधानमन्त्री केपी शर्मा ओलीले नेपालको संविधान विश्वकै उत्कृष्ट संविधान भएको बताएका छन् ।
सोमवार नेपालको संविधान सम्मेलन नामक कार्यक्रमको समापन गर्दै प्रधानमन्त्री ओलीले बहुमतबाट निर्माण गरिएको संविधान विश्वकै उत्कृष्ट भएको बताएका हुन् । संविधान निर्माणसँगै संविधान कार्यान्वयनमा जोड दिदै जनताको प्रत्यक्ष जीवन शैलीसँग जोडिएका हक अधिकारलाई सुनिश्चित गर्न नेपालको संविधान सफल भएको पनि उनको दाबी थियो । संविधानमा फरक मत राख्दै आएका विभिन्न राजनीतिक दलका मागलाई समेत सम्बोधन गर्दै र आवश्यकताका आधारमा संविधानलाई संशोधन गरेर सर्वोपरि संविधान बनाउने सरकारको उद्धेश्य रहेको प्रधानमन्त्री ओलीको तर्क थियो ।
नेपाली इतिहासमा निर्माण गरिएका ७ वटा संविधान मध्येको उत्कृष्ट संविधानले जनतालाई विभिन्न हक र अधिकार दिएर सभ्य समाज निर्माण गर्न समेत सफल भएको उनले बताए । संविधानले दिएका अधिकारको सुनिश्चितताका लागि आवश्यक ऐन कानून निर्माण गरेर संविधानलाई कार्यान्वयन गर्न सरकार अग्रसर रहेको प्रधानमन्त्री ओलीको दावी थियो ।
