काठमाडौं, १ बैशाख । हरेक वर्ष नेपाली फिल्म क्षेत्रमा नयाँ अनुहारको आगमन तिव्र गति भइरहेको छ । तर सफलता भने मुश्किलले २ वा ३ जनाले मात्र हात पारेका छन् । वर्ष २०७४ मा नव-अभिनेत्रीको कुरा गर्ने हो भने दीपिका प्रसाईँ बाहेक अरुको नाम लिन कठिन हुन्छ ।
यसैबीच शुक्रवारबाट प्रदर्शनमा आएको फिल्म ‘लिलिबिली’ बाट नेपाली फिल्म क्षेत्रले सम्भावना बोकेको एक नायिका पाएको छ । उनी हुन् जसिता गुरुङ ।
रिलिज अगाडिसम्म युवा स्टार प्रदीप खड्काको स्टारडमको छायाँमा पर्ने डर उनमा थियो । तर, फिल्म रिलिजपछि प्रदीप नै उनीसँग डराउनु पर्ने देखिएको छ । अर्थात्, उनले नै फिल्म धान्ने जिम्मेवारी पाएकी छिन् । प्रदीपमाथी उनी हाबी छिन् ।
हुनत, ‘लिलिबिली’ रिलिज अगाडिदेखि नै उनी चर्चामा थिइन् । गीतसंगीत र ट्रेलरबाटै जसिताको तारिफ भएको थियो । फिल्म हेरेपछि उनको डाइलग डेलिभरी, सुन्दरता र अभिनयको सबैभन्दा बढी प्रशंसा भैरहेको छ ।
फिल्मको सबैभन्दा बलियो पक्ष मध्ये जसिताको अभिनय पनि एक हो । हुनत, उनले अभिनयमा सुधार गर्नु पर्ने धेरै बाँकी छ । तर, तपाईले यो फिल्म हेर्ने एउटा कारण, नव-अभिनेत्री जसिता पनि हुन सक्छिन् ।नेपाली फिल्ममा आफ्नो भविष्य सुरक्षित गर्न केही मिहिनेत गरेको खण्डमा उनलाई नेपाली फिल्म क्षेत्रले सम्भावना बोकेको नायिकाको रुपमा हेर्न सक्नेछ ।
‘लिलिबिली’ हेर्दै गर्दा एउटा कुरामा नझुकिनु होला, यसमा जसिताको सट्टामा अभिनेत्री सारा सिर्पालीको स्वर डविङ गराइएको छ । लामो समयदेखि बेलायतमा बस्दै आइरहेकी उनको नेपाली बोलाई शुद्ध नभएको कारण निर्माण टिमले ‘रिक्स’ उठाउन नचाहेको बुझिएको छ ।
मिलन चाम्स निर्देशित यस फिल्ममा प्रदीप र जसिताका अलावा प्रियंका कार्की, अनुपबिक्रम शाही, सविन श्रेष्ठ, मनिष श्रेष्ठ, ध्रुव दत्त, रितेश चाम्स लगायतका कलाकारको अभिनय छ ।
काफिया फिल्म्स्, सुदीप खड्का प्रोडक्सन र चाम्स इन्टरटेनमेन्टको व्यानरमा निर्माण भएको ‘लिलिबिली’ मा गोविन्द शाही, सुदिप खड्का र निर्देशक चाम्सको लगानी छ ।
