एजेन्सी, १८ चैत । अमेरिकी सरकारले देश छाड्न आदेश दिएका ६० रुसी कुटनीतिज्ञ सहित तिनका परिवारले वाशिङटन छाडेका छन् ।
बेलायतमा एकजना पूर्वरुसी जासुसमाथि स्नायु प्रणालीमा असर पार्ने विषाक्त रासायनिक पदार्थ प्रयोग गरी हमला गरेको घटनालाई लिएर अमेरिकाले रुसी कुटनीतिज्ञलाई देश निकाला गरेको थियो । कूटनीतिज्ञ र उनीहरूका परिवारका सदस्यसहित १७० जनाले वासिंटन छाडेको बीबीसीले जनाएको छ । कुटनीतिज्ञका परिवार दुईवटा विमानबाट मस्को फर्केका हुन् ।
यता रुसले पनि ६० जना अमेरिकी कुटनीतिज्ञलाई देश निकाला गरिसकेको छ । रुसको सेन्ट पिटर्सबर्गस्थित अमेरिकी कन्सुलेट बन्द गर्ने रुसी सरकारको निर्देशनपछि त्यहाँबाट अमेरिकी झण्डा हटाइएको छ ।
