काठमाडौं, २२ फागुन । पाकिस्तानी प्रधानमन्त्री शाहीद खकान अब्बासी दुई दिने नेपाल भ्रमण पूरा गरी अहिले केहीबेरमा स्वदेश फर्कंदै छन । अब्बासीले स्वदेश फर्कनुपहिले माओवादी केन्द्रका अध्यक्ष पुष्पकमल दाहाललाई आफू बसेकै होटलमा तथा राष्ट्रपति विद्यादेवी भण्डारीलाई शितल निवास पुगेर भेटवार्ता गरेका छन ।
भेटवार्तामा दुई देशको आपसी हितका विषयमा छलफल भएको बताइएको छ । अब्बासीले सोमबार बेलुका प्रधानमन्त्री केपी शर्मा ओलीसँग राजनीतिक एवं आर्थिक विषयमा केन्द्रीत रहेर वार्ता गरेका थिए ।
वार्ताका क्रममा सार्कको १९ औं शिखर सम्मेलनका विषयमा पनि छलफल भएको प्रधानमन्त्रीका राजनीतिक सल्लाहकार विष्णु रिमालले जानकारी दिए । भेटवार्ताका क्रममा अब्बासीले प्रधानमन्त्री ओलीलाई बधाई दिंदै पाकिस्तान भ्रमणको निम्ता दिएका छन ।
