इस्लामावादको एक अस्पतालमा आगलागी हुँदा १४ शिशुको मृत्यु

पाकिस्तानको राजधानी इस्लामावादस्थित ‘पाकिस्तान इन्स्टिच्युट अफ मेडिकल साइन्सेस’ (पीआईएमएस) को प्रसूति वार्डमा बुधवार बिहान भीषण आगलागी हुँदा कम्तीमा १४ नवजात शिशुको मृत्यु भएको छ । प्रहरी स्रोतकाअनुसार अस्पतालको तेस्रो तलामा रहेको प्रसूति वार्डमा स्थानीय समयअनुसार बिहान करिब ६ः४० बजे आगलागी भएको थियो । सो वार्डमा शिशुहरूलाई उपचारका लागि राखिएको अवस्थामा आगलागी सुरु भएको चिनियाँ समाचार संस्था सिन्ह्वाले उल्लेख गरेको छ । आगलागी भएलगत्तै अस्पताल प्रशासन, दमकल, एम्बुलेन्स र प्रहरी टोली उद्धारका लागि घटनास्थल पुगेका थिए । उद्धारकर्मीहरूले वार्डबाट केही शिशुहरूलाई सुरक्षित बाहिर निकाल्न सफल भए पनि ठूलो संख्यामा मानवीय क्षति भएको छ । स्रोतका अनुसार ९ जना शिशुको घटनास्थलमै मृत्यु भएको थियो भने गम्भीर घाइते भएका अन्य ५ जनाको बाल वार्डमा उपचारका क्रममा मृत्यु भएको हो । प्रहरीले आगलागीको कारण पत्ता लगाउन अनुसन्धान शुरु गर्नुका साथै घटनामा भएको क्षतिको थप विवरण संकलन गरिरहेको जनाएको छ ।