जुलाईमा अमेरिकी मुद्रास्फीति उच्च नै कायम, फेडरल रिजर्भको लक्ष्यभन्दा माथि

अमेरिकामा मुद्रास्फीतिको चाप अझै पनि उच्च तहमा रहेको देखिएको छ । अमेरिकी वाणिज्य मन्त्रालयले बुधबार सार्वजनिक गरेको तथ्याङ्कअनुसार जुलाई महिनामा वार्षिक मुद्रास्फीति दर ३.७ प्रतिशत कायम भएको छ । अमेरिकी केन्द्रिय बैंक ‘फेडरल रिजर्भ’ ले मुद्रास्फीति मापनको प्रमुख आधार मान्ने व्यक्तिगत उपभोग खर्च (पीसीई) मूल्य सूचकाङ्क जुलाई महिनामा मौसमी समायोजनपश्चात् ०.२ प्रतिशतले वृद्धि भएको छ । यो वृद्धि दर अनुमान गरिएको भन्दा केही बढी हो । यस्तै, अस्थिर मानिने खाद्य र ऊर्जाको मूल्य समावेश नगरिने ‘कोर पीसीई’ मुद्रास्फीति मासिक ०.२ प्रतिशत र वार्षिक ३.३ प्रतिशतले बढेको छ, जुन बजारको पूर्वानुमान बमोजिम नै रहेको छ ।
वाणिज्य मन्त्रालयको प्रतिवेदनले व्यक्तिगत आम्दानीमा ०.४ प्रतिशतको वृद्धि भएको देखाए पनि उपभोक्ता खर्चमा भने ०.२ प्रतिशतको सामान्य बढोत्तरी मात्र देखिएको छ । विशेषगरी सेवा क्षेत्रमा मूल्यको चाप उल्लेख्य रहेको र त्यहाँ मूल्यस्तर ०.३ प्रतिशतले बढेको प्रतिवेदनमा उल्लेख छ ।
तथ्याङ्क सार्वजनिक भएलगत्तै अमेरिकी सेयर बजारको फ्युचर्स सूचकाङ्कमा गिरावट आएको छ भने ट्रेजरी ऋणपत्रको प्रतिफल (यिल्ड) मा वृद्धि भएको छ । लामो समयदेखि जारी उच्च मूल्यवृद्धिका कारण सर्वसाधारणको मनोबलमा समेत नकारात्मक असर परेको देखिएको छ । स्थानीय सञ्चारमाध्यम डब्ल्यूपीएक्सआई–टिभीकाअनुसार विगत पाँच वर्षदेखि कायम उच्च मुद्रास्फीतिका कारण अमेरिकी नागरिकहरू अर्थतन्त्रको अवस्थाप्रति असन्तुष्ट रहेका छन् ।
फेडरल रिजर्भका अधिकारीहरू आगामी मौद्रिक नीतिका सम्बन्धमा निर्णय लिने तयारीमा रहेका बेला यो पछिल्लो तथ्याङ्क सार्वजनिक भएको हो । ग्रीष्मकालीन महिनाहरूमा मासिक मुद्रास्फीति दरमा केही सुस्तता देखिए तापनि समग्र मुद्रास्फीति अझै पनि केन्द्रिय बैंकले तोकेको २ प्रतिशतको लक्ष्यभन्दा निकै माथि रहेको छ ।