काठमाडौं, ८ फागुन । २४ जिल्लामा सरकारले हात्तीपाईले रोगको औषधि खुवाउने भएको छ । लामखुट्टेको टोकाइबाट सर्ने हात्तीपाइले रोग निवारणका लागि औषधि सेवन गराउने कार्यक्रम फागुन १२ देखि १४ गतेसम्म सञ्चालन गर्न लागेको स्वास्थ्य सेवा विभाग इपिडिमियोलोजी तथा रोग नियन्त्रण महाशाखाले जनाएको छ ।
कार्यक्रम अन्र्तगत २४ जिल्लाका ९१ लाख ५४ हजार मानिसलाई लक्षित गरी औषधी खुवाउन लागिएको हो । नेपालमा कुल जनसङ्ख्याको २ करोड ५० लाख जनसङ्ख्या हात्तीपाइले रोगको जोखिममा रहेको महाशाखाको तथ्याङ्कले देखाएको छ । तथ्यांकअनुसार नेपालका ६१ जिल्ला हात्तीपाइले रोगको जोखिममा छन् ।
विश्व स्वास्थ्य संगठनले संसारभरबाटै सन् २०२० सम्ममा औषधी सेवन कार्यक्रम मार्फत नै यो रोग निवारण गर्ने लक्ष्य राखेको छ । साथै नेपालमा ३० हजार भन्दा बढी हात्तीपाइले रोगका कारण अपाङ्ग भएको तथ्याङ्कले देखाएको छ । नेपालका १४ ओटा जिल्लामा यो रोग नदेखिएको र ३७ जिल्लामा नियन्त्रणमा रहेको महाशाखाले जनाएको छ ।
