५६ मध्ये २४ सिट निर्विरोध, ३२ सिटका लागि ५२ उम्मेदवार चुनावी मैदानमा
काठमाडौंं, १५ माघ । निर्वाचन आयोगले राष्ट्रिय सभा निर्वाचनका लागि उम्मेदवारहरुको अन्तिम नामावली प्रकाशन गरेको छ । सोमबार आयोगले प्रकाशन गरेको नामावलीअनुसार सात प्रदेशबाट २४ जना निर्विरोध निर्वाचित भएका छन् ।
विभिन्न कलष्टरका २४ सिटमा निर्वाचित हुने संख्या अनुसार नै उम्मेदवारी परेकाले ती उम्मेदवारहरु निर्विरोध निर्वाचित भएका आयोगका प्रवक्ता नवराज ढकालले जानकारी दिए । योसँगै अब राष्ट्रिय सभा निर्वाचनमा ५६ मध्ये ३२ सिटका लागि प्रतिष्पर्धा हुने छ ।
जसमा ५२ जना उम्मेदवार चुनावी मैदानमा छन् । ५९ सदस्यीय राष्ट्रियसभामा ३ सदस्य सरकारको सिफारिसमा राष्ट्रपतिबाट मनोनित हुने व्यवस्था छ । निर्वाचनमार्फत प्रत्येक प्रदेशबाट ८ जनाका दरले राष्ट्रियसभामा जाने छन् ।
संविधान अनुसार उक्त संख्यामा कम्तीमा तीनजना महिला, एकजना दलित र एकजना अपांगता भएका व्यक्ति वा अल्पसंख्यक तथा अन्य तीनजना हुनेछन् । यसअघि प्रदेश नम्बर २ मा ८ जना नै निर्विरोध निर्वाचित भएका छन् भने अन्य प्रदेशमा पनि केही उम्मेदवारले नाम फिर्ता लिएपछि कतिपय सिट निर्विरोध भएको हो । प्रदेश नम्बर ३ र ६ को भने ८ वटै पदका लागि निर्वाचन हुने भएको छ ।
राष्ट्रिय सभाको निर्वाचन यही माघ २४ गतेका लागि तोकिएको छ । यसैबीच आयोगले निर्वाचनका लागि माघ २१ गतेसम्म आवश्यक कर्मचारी पठाउने तयारी समेत गरेको छ । मतदान र मतगणना स्थल ७ प्रदेशको उच्च अदालत भएको जिल्लामा तोकिएको छ ।
कुल मतदाता २ हजार ५६ रहेको राष्ट्रिय सभा सदस्य निर्वाचनमा मत संकेत कसरी गर्ने भन्नेबारे विभिन्न तालिम प्रशिक्षण आजबाट प्रदेश स्तरमा सुरु गरिएको आयोगले जनाएको छ ।