जापानले परमाणु शक्तिबाट सञ्चालित पनडुब्बी भित्र्याउने योजना अघि बढाएको भन्दै त्यसको विरोधमा दशौँ हजार नागरिकले हस्ताक्षर अभियान चलाएका छन् । जापानका विभिन्न नागरिक संस्थाहरूले शुक्रबार ४७ हजार हस्ताक्षरसहितको विरोधपत्र रक्षा मन्त्रालयमा बुझाउँदै सरकारलाई उक्त योजना त्याग्न आग्रह गरेका हुन् । सिटिजन्स न्युक्लियर इन्फर्मेसन सेन्टरसहित विभिन्न नागरिक समाजका संस्थाहरूले संयुक्त रूपमा सञ्चालन गरेको अभियानबाट करिव एक महिनामै ४७ हजार हस्ताक्षर सङ्कलन गरिएको आयोजकहरूले जनाएका छन् । विरोधपत्रमा जापान परमाणु बम आक्रमणको पीडा भोगेको विश्वको एकमात्र देश भएकाले उसले लामो समयदेखि परमाणु निःशस्त्रीकरणको पक्षमा आवाज उठाउँदै आएको उल्लेख गरिएको छ । यस्तो अवस्थामा परमाणु शक्तिबाट सञ्चालित पनडुब्बी भित्र्याउने निर्णय गर्नु जापानको ऐतिहासिक प्रतिबद्धताविपरीत हुने उनीहरूको तर्क छ । हस्ताक्षर बुझाएपछि आयोजित पत्रकार सम्मेलनमा नागरिक संस्थाका प्रतिनिधिहरूले सरकारको पछिल्लो नीतिप्रति चिन्ता व्यक्त गरेका थिए । उनीहरूले परमाणु पनडुब्बी भित्र्याउने विषयमा भइरहेको छलफल र जापानका तीन गैरपरमाणु सिद्धान्तमा छुट दिने सम्भावित प्रयासले जापानको गैरपरमाणु राष्ट्रको पहिचानमै आधारभूत परिवर्तन ल्याउन सक्ने बताएका छन् । जापानमा पछिल्ला महिनाहरूमा परमाणु नीतिसम्बन्धी बहस तीव्र बनेको छ । रक्षामन्त्री सिन्जिरो कोइजुमीले परमाणु शक्तिबाट सञ्चालित पनडुब्बी भित्र्याउने विषयमा अध्ययन र छलफल गर्दा कुनैपनि विकल्पलाई अस्वीकार नगर्ने बताउँदै आउनुभएको छ । त्यस्तै, प्रधानमन्त्री साने ताकाइचीले अक्टोबरमा संसद्मा बोल्दै आत्मरक्षा बलले परमाणु शक्तिबाट सञ्चालित पनडुब्बी प्राप्त गर्ने सम्भावनाबारे सरकारले ठोस र व्यावहारिक छलफल गर्ने बताउनुभएको थियो ।
यसैबीच, जापानी सञ्चारमाध्यमहरूले राष्ट्रिय सुरक्षा रणनीति संशोधनका क्रममा सरकारले तीन गैरपरमाणु सिद्धान्तमा केही अपवाद राख्ने विषयमा पनि विचार गरिरहेको जनाएका छन् । यसअन्तर्गत आपत्कालीन अवस्थामा परमाणु हतियारलाई जापानी भूमिमा प्रवेश गर्न अनुमति दिने सम्भावनाबारे छलफल भइरहेको बताइएको छ । जापानका तीन गैरपरमाणु सिद्धान्तमा परमाणु हतियार नराख्ने, उत्पादन नगर्ने र आफ्नो भूमिमा प्रवेश गर्न नदिने नीति समावेश छ । सरकारले यसमा सम्भावित परिवर्तन गर्ने तयारी गरेको समाचार सार्वजनिक भएपछि सर्वसाधारण तथा नागरिक संस्थाहरूले विरोध र चिन्ता व्यक्त गर्दै आएका छन् ।




