काठमाडौं । फ्रान्सको राष्ट्रपतिमा मध्यमार्गी नेता इम्यानुएल म्याक्रोन निर्वाचित हुनुभएको छ । आइबार भएको दोस्रो चरणको चुनावमा म्याक्रोनले दक्षिण पन्थी उम्मेद्वार मरिन लि पेनलाई हराएर राष्ट्रपतिमा निर्वाचित हुनुभएको हो ।
म्याक्रोन ६६ दशमलव ०६ प्रतिशत मत ल्याएर विजयी हुनुभएको बिबिसीले जनाएको छ । दक्षिण पन्थी नेतृ लि पेनले ३३ दशमलव ९४ प्रतिशत मत ल्याउनु भएको छ ।
३९ वर्षका म्याक्रोन फ्रान्सको इतिहासमा कम उमेरमा राष्ट्रपति बन्नु भएको छ । यस्तै फ्रान्समा सन् १९५८ मा आधुनिक प्रजातान्त्रिक व्यवस्था सुरुभएयता परम्परागत रुपमा रहँदै आएका दुई ठूला पार्टी भन्दा बाहिरबाट राष्ट्रपति बन्ने म्याक्रोन पहिलो व्यक्ति बन्नुभएको छ ।
राष्ट्रपतिमा निर्वाचित हुनुभएका म्याक्रोनले फ्रान्सको इतिहासमा नयाँ समय सुरु भएको बताउनुभयो । अबको समय विश्वास र आशाको समय बनाउन चाहेको उहाँले बताउनुभएको छ ।
९३ प्रतिशत भन्दा बढी मतगणना भइसक्दा म्याक्रोनले एक करोड ९३ लाख तथा लि पेनले एक करोड चार लाख मत पाउनु भएको फ्रान्सको आन्तरिक मामिला मन्त्रालयले जनाएको छ ।
चुनावी अभियानका क्रममा उम्मेद्वारले अर्काकामाथि आरोप प्रत्यारोप गरेका थिए । यसले देश राजनीतिक रुपमा विभाजित अवस्थामा पुगेको छ ।
म्याक्रोन र पेन गएको अप्रिल २३ मा भएको पहिलो चरणको चुनावमा अरु प्रतिस्पर्धीलाई पछि पार्दै दोस्रो चरणमा पुग्नु भएको थियो ।
पहिलो चरणको चुनावमा ११ जना प्रत्यासी थिए । मध्यमार्गी म्याक्रोनले व्यावसायिक विस्तार तथा युरोपियन युनियनको सर्मथक रहनु भएको छ ।
