काठमाडौं, १७ पुस। अमेरिकाको कोलोराडोमा सुरक्षाकर्मीमाथि अन्धाधुन्ध गोली प्रहार, एक प्रहरीको मृत्यु, चारजना घाइते, गोली लागेर अमेरिकामा एक वर्षमा १५ हजारको ज्यान गयो ।
अमेरिकाको कोलोराडोमा सुरक्षाकर्मीलाई लक्षित गर्दै गरिएको गोली प्रहारमा एक प्रहरीको मृत्यु भएको छ ।
गोली लागेर चार जना घाइते भएका छन् । डेनवरको दक्षिणी क्षेत्र हाइल्याण्डस् रान्चस्थित अपार्टमेन्टमा धन्धाधुन्ध गोली प्रहार भएको हो । घटनामा दुईजना सर्वसाधारण पनि घाइते भएको स्थानीय अधिकारीले जनाएका छन् । अपार्टमेन्टमा दुई पुरुष रुममेटबीच झगडा भएको थाहा पाएपछि छिमेकीले प्रहरीलाई खबर गरेका थिए ।
त्यसपछि प्रहरी आएको र घटनाले गोलीकाण्डको रुप लिएको बताइएको छ । अपार्टमेन्टमा बस्ने आक्रमणकारीले प्रहरीलाई लक्षित गरी अन्धाधुन्ध गोली चलाएका थिए । प्रहरीले गरेको जवाफी कारबाहीमा आक्रमणकारीको पनि मृत्यु भएको छ । अमेरिकामा सन् २०१७ मा गोली प्रहारबाट १५ हजार मानिसको मृत्यु भएको छ ।
