काठमाडौं, ११ फागुन । राष्ट्रपतिको मामलाले राजनीतिक समिकरणमा बदलाव आउने अवस्था बनेको छ । सत्ता समिकरण छिन्नभिन्न हुने परिस्थिति बन्दै गएको छ । विपक्षी गठबन्धनमा पनि यताउता हुने गरी घटनाक्रम विकास भइरहेको छ ।
मंसिर ४ को निर्वाचन अघि एउटै गठबन्धनमा रहेर चुनावपछि टुटेको नेपाली काँग्रेस र नेकपा माओवादी केन्द्र फेरि पुरानै अवस्थामा फर्किने परिस्थिति बनेको छ । उनीहरुले बिहिबार साँझसम्म लिखित सहमति नै गरेर राष्ट्रपतिमा साझा उम्मेदवार तय गरी राजनीतिक लेनदेनसहित सम्झौता गर्ने भएका छन् ।
काँग्रेसका प्रभावशाली नेता विमलेन्द्र निधिले राष्ट्रपतिमा माओवादीले आफ्नो दलको उम्मेदवारलाई समर्थन गर्ने गरी पुरानो गठबन्धन कायम राख्ने तय भएको बताए । निधिले भने, ‘मिलेर संसद्को चुनावमा गएका हामी एक ठाउँमा उभिदैछौं ।’
सम्झौता अघि नेपाली काँग्रेसले बिहिबार विहान पार्टी बैठक डाकेको छ । माओवादी केन्द्रले राष्ट्रपतिमा कस्लाई साथ दिने भन्ने निर्णयको अधिकार अध्यक्ष समेत रहेका प्रधानमंत्री प्रचण्डलाई जिम्मेवारी दिइसकेको छ ।
राष्ट्रपतिसहित शक्तिबाँडफाँडमा काँग्रेस र माओवादीबीच सहमतिको खाका तय भइसकेको बुझिएको छ । दुवै दलका शिर्ष नेताहरु बसेर यसको खाका बनाएका हुन् । जस अनुसार राष्ट्रपतिमा काँग्रेसलाई समर्थन गरेर प्रधानमंत्रीमा प्रचण्डलाई साथ दिइरहने गरी काँग्रेस तयार भएको छ । काँग्रेस नेता निधिले भने अहिले राष्ट्रपतिबारे सहमति भइसकेको र अरु कुरा पछि हुने बताए ।
अहिलेसम्म रहेको एमाले, नेकपा एससहितको सत्ता गठबन्धन टुट्ने निश्चितप्रायः भएको छ । यसकारण यूएमएल अध्यक्ष केपी शर्मा ओलीले एसका अध्यक्ष माधवकुमार नेपाललाई आफ्नो पक्षमा पार्न राष्ट्रपतिको प्रस्ताव गरेका छन् । नेता नेपाल पनि सक्रिय भई राष्ट्रपतिको दौडमा सामेल छन् । एस काँग्रेससँगको गठबन्धनमा छ । उसलाई एमालेले पक्षमा पार्न खोजेपनि उक्त दलका नेताहरु सतर्क छन् ।
नेकपा एसका नेता सोमप्रसाद पाण्डेले राजनीति तरल अवस्थामा रहेकाले यसै भन्न नसकिने बताए । उनले राष्ट्रपतिका लागि माधव नेपालको नाममा राष्ट्रिय सहमति बन्न सक्ने दाबी गरे । तर, अहिले नै एमालेसँग आफ्नो दल सहमतिमा गइहाल्ने अवस्था नभएको बताए ।
सत्तापक्ष र विपक्षका गठबन्धन दलहरुले स्थान बदलेमा राजनीतिक रोचक मोडमा पुग्न सक्छ । काँग्रेस र माओवादी एकै ठाउँमा आएर नेकपा एस पनि गठबन्धनमै रहेमा यूएमएललाई धक्का पर्न सक्छ । यसकारण पनि माधव नेपाल नेतृत्वको एस निर्णायक शक्तिका रुपमा देखिन थालेको छ ।
२५ फरवरीको नेपालमा राष्ट्रपति निर्वाचनका लागि मनोनयन दर्ताको मिति छ । त्यो मितिबाटै गठबन्धनहरु भत्कने र नयाँ बन्ने घटना विकास हुन लागेको छ ।
