काठमाडौं, २ फागुन । ट्राफिक प्रहरीले वृद्धि गरेको जरिवानाविरुद्ध आज उपत्यकाका सार्वजनिक सवारी साधन चलेका छैनन् । नेपाल यातायात स्वतन्त्र संगठन, अखिल नेपाल यातायात मजदुर संघ र नेपाल यातायात मजदुर संघले सार्वजनिक यातायातको सेवा ठप्प पारेका हुन् । अहिले उपत्यकामा सार्वजनिक यातायात सेवा ठप्प रहेको छ । निजी सवारी साधन मात्र सञ्चालन भएपछि सडक खाली जस्तै देखिएको छ ।
सोमबार आक्रोसित मजदुरहरुले बालाजु बसपार्कमा प्रहरीको भ्यानमा आगजनी समेत गरेका थिए । हिजो आन्दोलनकारीले सडकमा राखिएका डिभाइडर, प्रहरी उभिने आइल्याण्डलगायतका संरचनामा समेत आगजनी र तोडफोड गरेका थिए ।
माछापोखरी, गोंगबु, सामाखुशी चोकमा मजदुरहरुले हिजो सडक अबरुद्ध पारेका थिए । आन्दोलनरत पक्षलाई आज भौतिक पूर्वाधार तथा यातायात मन्त्रालयले बोलाएको जनाइएको छ ।