रोनाल्डो विना नै रियलको शानदार जित, अंक तालिकामा भने दोस्रो

काठमाडौं । स्पेनिस ला लिगामा गएको बुधबार भएको खेलमा बराबरीमा रोकिएको रियल मड्रिडले पनि शानदार जित दर्ता गरेको छ । लिग अन्तर्गत शनिबार राति भएको खेलमा रियल मड्रिडले एइबरलाई ४–१ ले हरायो ।

एइबरको मैदानमा भएको खेलमा रियल मड्रिड क्रिष्टियानो रोनाल्डो र ग्यारेथ बेल बिना नै खेलेको थियो । रोनाल्डो चोटका कारण तथा बेल प्रतिबन्धका कारण मैदान बाहिर थिए । रियललाई जिताउन करिम बेन्जिमाले दुई तथा जेम्स रोड्रिग्वेज र मार्को एसेनसियोले एक एक गोल गरे ।

एइबरका लागि रुबेन पेनाले एक गोल फर्काए । जितपछि दोस्रो स्थानको रियल मड्रिडको २६ खेलबाट ५९ अंक भएको छ ।

शीर्ष स्थानको बार्सिलोनाको ६० अंक छ । बार्सिलोनाले एक खेल बढी खेलेको छ । राति भएका अरु खेलमा भिल्लारियलले स्पानियोललाई २–० तथा लेगानेसले ग्रनाडालाई १–० ले हरायो ।