काठमाडौं । स्पेनिस ला लिगाको शीर्ष स्थानको रियल मड्रिडले चार अंकको अग्रता कायम गरेको छ । लिग अन्तर्गत आइतबार राति भएको खेलमा रियल मड्रिडले रियल सोसिडाडलाई ३–० ले हरायो ।
१० खेलाडीमा सीमित भएको रियल सोसिडाडलाई हराउने क्रममा रियल मड्रिडका लागि माटेओ कोभाकिक, क्रिष्टियानो रोनाल्डो र अल्वारो मोराटाले गोल गरे ।
३८ औं मिनेटमा कोवाकिकले गोल गर्दै पहिलो हाफमा रियल मड्रिडलाई १–० को अग्रता दिलाए । ५१ औं मिनेटमा रोनाल्डोले रियल मड्रिडको अग्रता दोब्बर पारे ।
रोनाल्डोले ला लिगामा यो सिजन १५ खेलमा १३ गोल गरेका छन् । ७४ औं मिनेटमा इनिगो मार्टिनेज दोहोरो पहेँलो कार्ड खाँदै मैदानबाट बाहिरिएपछि रियल सोसिडाड १० खेलाडीमा सीमित भयो ।
८२ औं मिनेटमा मोराटाले गोल गरेपछि रियल मड्रिडले ३–० को जित दर्ता र्गयो । यता स्पेनिस ला लिगामा मै लुइस स्वारेजले अन्तिम समयमा गोल गर्दै बार्सिलोनालाई हारबाट जोगाएका छन् ।
ला लिगा अन्तर्गत आइतबार बेलुका भएको खेलमा बार्सिलोना रियल बेटिससँग १–१ को बराबरीमा रोकिएको हो । पहिलो हाफमा गोलरहित बराबरी भएको खेलमा ७५ औं मिनेटमा एलेग्रिए मोरेनोले गोल गर्दै घरेलु टोली रियल बेटिसलाई १–० को अग्रता दिलाए ।
मोरेनोले गोल गर्नुअघि पनि रियल बेटिसका डानी सेबालोस र रुबेन क्यास्ट्रोले प्रहार गरेको बल पोलमा लागेर फर्किएको थियो ।
८९ औं मिनेटसम्म १–० ले पछि परेको बार्सिलोनाका लागि लुइस स्वारेजले ९० औं मिनेटमा बराबरी गोल फर्काए ।
लियोनल मेस्सीको पासमा स्वारेजले गोल गरेका हुन् । बराबरीपछि बार्सिलोनाले शीर्ष स्थानको रियल मड्रिडसँगको अंक दूरी कम गर्ने मौका त गुमायो तर सेभिल्लालाई पछि पार्दै दोस्रो स्थानमा उक्लिन भने सफल भयो ।
बार्सिलोनाको २० खेलबाट ४२ अंक भएको छ । एक खेल कम खेलेको रियल मड्रिडको ४६ अंक छ । तेस्रो स्थानको सेभिल्लाको पनि बार्सिलोना समान ४२ अंक नै छ ।