काठमाडौँ, १२ मंसिर । पहिलो चरण अन्तर्गत मंसिर १० गते भएको प्रतिनिधिसभा तथा प्रदेशसभा सदस्यको मतदानमा प्रयोग भएका मतपेटिका सदरमुकाम ल्याउने कार्य अन्तिम चरणमा पुगेको निर्वाचन आयोगले जनाएको छ ।
यद्यपी ३१ जिल्लाका सबै मतपेटिका जिल्ला सदरमुकाममा संकलन भइसकेका छन् । अब बाँकी रहेको डोल्पा जिल्लाका ९ वटा मतदान स्थलका मतपेटिकाहरु सदरमुकाम ल्याउने कार्य भइरहेको छ ।
निर्वाचन आयोगस्थित संयुक्त निर्वाचन सञ्चालन केन्द्रबाट प्राप्त पछिल्लो जानकारी अनुसार, कूल २ हजार ९१७ मतदानस्थलमध्ये अब डोल्पा जिल्लाका ९ मतदान स्थलका मतपेटिका आउन बाँकी छन् ।
डोल्पाका ६६ मतदान स्थलमध्ये से–फोक्सुन्डोमा ३ वटा मतदान स्थलका र थार्का ताङसोङ्कामा ६ वटा मतदान स्थलका मतपेटिका लिन हेलिकोप्टर सदरमुकाम पुगे पनि अत्यधिक हावा चलेका कारण उडान नहुन सकेन । उडान हुन नसकेकाले भोलि बुधबार मात्र मतपेटिका ल्याउने कार्य अघि बढ्ने आयोगले जनाएको छ ।
