पेरिस । च्याम्पियन्स लिग अन्तर्गत नकआउट चरणको पहिलो लेगको खेलमा पेरिस सेन्ट जर्मन (पिएसजी) ले बार्सिलोनालाई ४–० ले पराजित गरेको छ ।
पिएसजीका दुई बर्थडे ब्वाई अर्जेन्टिनाका एन्जेल डि मारिया र उरुग्वेका एडिन्सन काभानीले संयुक्तरुपमा तीन गोल गरेपछि बार्सिलोनाले ४–० को पराजय भोग्नुपर्यो ।
नेपाली समयअनुसार बिहान ३ बजेर २२ मिनेटमा पेरिसको पार्क डे प्रिन्सेस रंगशालामा समाप्त भएको खेलमा बार्सिलोनाले पहिलो हाफमा २ र दोस्रो हाफमा पनि २ गोल खायो ।
डि मारिया र काभानीको फेब्रवरी १४ मै जन्मदिन परेको थियो । डि मारियाले खेल सुरु भएको १८ मिनेटमै फ्रिकिकमार्फत गोल गर्दै घरेलु समर्थकलाई २९ औं जन्मदिनको उपहार दिएका थिए । उनले दोस्रो हाफको ५५ मिनेटमा पनि अर्को गोल गरे ।
काभानीले ७१ मिनेटमा गोल गरे । ३० वर्षमा प्रवेश गरेका काभानीको च्याम्पियन्स लिगमा सातौं गोल थियो ।
अर्को गोल जर्मनीका युवा विङ्गर जुलियान ड्राक्स्लरले गरे । उनले ४० मिनेटमा गोल गरेका थिए ।
च्याम्पियन्स लिगमा ४ गोलको स्पष्ट अन्तरले पराजित भएको बार्सिलोनाको पहिलो घटना हो । बार्सिलोनालाई अब क्वाटरफाइनलमा स्थान बनाउन आफ्नो घरेलु मैदान नोउ क्याम्पमा यस्तै खेल दोहर्याउनु पर्नेछ ।
बार्सिलोना सन् २००६–०७ को सिजन अन्तिम पल्ट च्याम्पियन्स लिगको क्वाटरफाइनल प्रवेश गर्न असफल भएको थियो।
बार्सिलोनाको खेल हेरेर भ्यालेन्टाइन डेको मज्जा लिन रंगशाला पुगेका उस्का समर्थकहरु निराश भएर फर्कीएका थिए ।