गुल्मी । गुल्मीमा करिब दुई सय जनाको मोतिविन्दुको निःशुल्क शल्यक्रिया गरिएको छ । डाक फाण्डेशनको सहयोग तथा नेपाल नेत्र ज्योति संघ जिल्ला आँखा उपचार केन्द्र तम्घास गुल्मीको सहकार्यमा तीन वटा निःशुल्क आँखा शिविर सम्पन्न भएका छन् ।
शिविरमा १८४ जनाको निःशुल्क मोतिविन्दुको सफल शल्यक्रिया गरिएको जिल्ला आँखा उपचार केन्द्र तम्घास गुल्मीका नेत्र अधिकृत सूर्य बस्नेतले जानकारी दिए । बस्नेतका अनुसार तीनवटै शिविर सदरमुकाम तम्घासको आँखा उपचार केन्द्रमा सञ्चालन गरिएको थियो ।
गत ९ र १० पुसमा सञ्चालन भएको आँखा शिविरमा ५६ जनाको शल्यक्रिया र दुई सयभन्दा धेरैले आँखा परीक्षण गराएका थिए । शिविरमा परासी आँखा अस्पतालका निर्देशक सर्जन डा.सविता ढकाल तथा जिल्ला आँखा उपचार केन्द्र तम्घासको टोलीले मोतिविन्दुको शल्यक्रिया गरेको नेत्र अधिकृत बस्नेतले बताए ।
त्यस्तै गत १६ फागुनमा सञ्चालन भएको शिविरमा २७ जनाको मोतिविन्दुको शल्यक्रिया र ७० जनाको आँखाको परिक्षण गरिएको थियो । शिविरमा लुम्बिनी नेत्र विज्ञान अध्ययन संस्थान भैरहवाका नेत्ररोग विशेषज्ञ डा.अमन गुप्ता तथा जिल्ला आँखा उपचार केन्द्रका टोलीले शल्यक्रिया गरेका थिए ।
२६ र २७ फागुनमा सञ्चालन भएको शिविरमा एक सय एक जनाको निःशुल्क मोतिविन्दुको शल्यक्रिया तथा चार सयभन्दा धेरैले आँखाको उपचार गराएको नेपाल नेत्र ज्योति संघ जिल्ला आँखा उपचार केन्द्र तम्घास गुल्मीले जनाएको छ ।
मोतिविन्दुको शल्यक्रियाका लागि मुख्य सर्जन डाक्टरबाहेक अन्य जनशक्ति जिल्लामै छन् । जिल्ला आँखा उपचार केन्द्र तम्घासमार्फत आँखाको ९० प्रतिशतसम्म उपचार भइरहेको जिल्ला आँखा उपचार केन्द्र गुल्मीका सभापति शेरबहादुर थापाले जानकारी दिए । जिल्लामा दैनिक आँखाको माइनर शल्यक्रिया र मासिक मोतिविन्दुको मेजर शल्यक्रिया गरिँदै आएको थापाले बताए ।
आँखा उपचार केन्द्रले सदरमुकाम बाहिर तीनवटा उपशाखामार्फत सेवा प्रवाह गरिरहेको छ । उक्त उपशाखाहरुबाट स्थानीय स्तरमै पनि आँखाको ६० प्रतिशत रोगको उपचार हुँदै आएको थापाले बताए । संस्थाले स्थानीय तह वा अरु संघ संस्थाको आयोजनामा शिविरहरू सञ्चालन गरेर पनि आँखाको परीक्षण, उपचार, शल्यक्रिया र चश्मा वितरण गरिरहेको छ ।
