काठमाडौं । नेकपा एमाले नेता माधव कुमार नेपाल पक्षको स्थायी कमिटी बैठक सुरु भएको छ । नेपाल पक्षको केन्द्रीय समिति बैठक बस्न अघि बुद्धनगरस्थित एक बैंक्वेटमा स्थायी कमिटी बैठक बसेको हो ।
नेताहरुका अनुसार बैठकले केन्द्रीय कमिटीको बैठकको एजेण्डा तय गर्ने छ ।
बैठकमा सहभागी हुनका लागि देशभरबाट एमालेका नेपाल पक्षका नेताहरु आएका छन् । यसअघि बुधबार नै बस्ने भनिएको केन्द्रीय कमिटीको बैठक उपत्यका बाहिर रहेका नेताहरु आइनपुगेकाले स्थगित गरिएको थियो ।
बैठकमा एमालेभित्रको एकता र भावी रणनीतिका विषयमा छलफल हुने बताइएको छ ।
यसै बैठकले एमाले विभाजन हुने वा एकता हुने विषयमा टुंगो लगाउने नेताहरुले बताएका छन् ।
यसैबीच एमाले वरिष्ठ नेता माधवकुमार नेपालले आज बोलाएको बैठकमा सहभागी नहुन अध्यक्ष केपी शर्मा ओली पक्षले अपिल गरेको छ ।
एमाले केन्द्रीय कार्यालयका सचिव शेरबहादुर तामाङले एक विज्ञप्ति जारी गर्दै आज केन्द्रीय कमिटी बैठक नबोलाइएको र माधव पक्षले राखेको बैठक बैधानीक नभएको उल्लेख गरेको छ ।