एजेन्सी, ९ कार्तिक । प्रिमियर लिग क्लब चेल्सी इंग्लीस फुटबल लिग कपको क्वाटरफाइनलमा प्रवेश गरेको छ। घरेलु मैदानमा एभरटनलाई २-१ ले पराजित गर्दै चेल्सीले अन्तिम आठमा स्थान बनाएको हो। चेल्सीका लागि एन्टोनिओ रुएडिगर र विलियाले गोल गरेका थिए भने एभरटनका लागि कलभर्ट लेविनले खेलको एक गोल गर्दै टिमलाई सान्त्वना दिए।

यस्तै टोटनहम वेष्टहमसँग ३-२ले पराजित भएको छ। पहिलो हाफमा २-० को अग्रता बनाएको टोटनहम दोस्रो हाफमा वेष्टहमले ३ गोल फर्काएपछि, टोटनहम ३-२ले पराजित भएको हो। टोटनहमको घरेलु मैदानमा भएको खेलमा माउसा सिसोकोले छैटौँ र डेले अलीले ३७औँ मिनेटमा गोल गरेका थिए।

तर पहिलो हाफ पछि टोटनहमले आफ्नो अग्रता कायम गर्न सकेन। वेष्टहमले दोस्रो हाफमा शानदार पुनरागमन गर्दै १५ मिनेटको अन्तरमा ३ गोल फर्कायो। ५५औँ र ६०औँ मिनेटमा आन्द्रे आयुले गोल गरेपछि वेष्टहमले खेल २-२ को बराबरी गर्‍यो। ७०औँ मिनेटमा एन्जेलो ओगोनाले गोल गर्दै वेष्टहमलाई ३-२ को अग्रता दिलाउँदं जित समेत दिलाए।