काठमाडौं। नेकपा एमालेको नेपाल समूहले पार्टी अध्यक्ष एवम् प्रधानमन्त्री केपी शर्मा ओलीलाई दिएको अन्तिम समय सकिएको छ ।
२०७५ जेठ २ गतेको अवस्थामा पार्टीलाई फर्काउनुपर्ने भन्दै खनाल समूहको आइतबार बसेको बैठकले आज बिहान ९ बजेसम्मको समय दिएको हो ।
पार्टी भित्र देखिएका अन्तरविरोधलाई हल गर्न आग्रह गर्दै दिएको समय सकिएको र अध्यक्ष ओलीबाट कुनै प्रतिक्रिया नआएको बताइएको छ । यसैबीच समस्या समाधानका विषयमा अध्यक्ष ओलीले कुनै चासो नदेखाएको भन्दै नेपाल पाक्षको बैठक बस्न लागेको र समूहिक राजीनामा दिने तयारी भएको नेताहरुले बताएका छन् ।
यता ओली पक्षले भने बसेर थप छलफल गर्नका लागि आफूहरु तयार भएको भए पनि पार्टी निकै अघि बढिसकेकोले २०७५ जेठ २ गतेको अवस्थामा फर्किने सम्भावना नरहेको बताउँदै आएको छ ।
एमाले अध्यक्ष एवम् प्रधानमन्त्री केपी शर्मा ओलीले आज संसदको विशेष अधिवेशनमार्फत विश्वासको मत लिँदै छन् । खनाल–नेपाल समूहले राजीनामा दिने भएसँगै प्रधानमन्त्री ओलीलाई विश्वासको मत लिन असहज हुने अनुमान गरिएको छ ।
