काठमाडौं । खोप अभियान अन्तर्गत पहिलो डोज लगाएकाहरुलाई आजदेखि ११ गतेसम्म दोस्रो डोज दिन लागिएको हो ।
स्वास्थ्य मन्त्रालयका अनुसार २०७७ माघ १४, १५, १६, १७ र २६ गते पहिलो डोज लगाएकाहरुलाई आज दोस्रो डोज दिइने छ । यसैगरी माघ १८, १९, २०, २१ र २७ गते खोप लगाएका हरुलाई वैशाख ८ गते दोस्रो डोज दिइने छ भने माघ २२, २३, २४, २८ र फागुन २ गते पहिलो डोज लगाएका लाई दोस्रो डोज लगाउने पालो वैशाख ९ गते तोकिएको छ ।
यसैगरी माघ २९ र फागुन ३, ४, ५ र ६ गते खोप लगाएकाहरुले वैशाख १० गते तथा माघ ३०, फागुन ७, ८, ९ र १० गते पहिलो खोप लगाएकाहरुले दोस्रो डोज वैशाख ११ गते लगाउनु पर्नेछ ।
कोभिसिल्ड खोपको पहिलो मात्रा लगाएका ४ लाख ३९ हजार जनालाई दोस्रो मात्रा दिइने भएको हो । पहिलो डोज जुन कम्पनीको खोप लगाएको हो, दोस्रो डोज पनि त्यही खोप लगाउनु पर्ने स्वास्थ्य मन्त्रालयले जनाएको छ ।
सरकारले २०७७ साल माघ १४ गतेदेखि कोरोनाविरुद्धको खोप अभियान सुरु गरेको थियो । गत माघ १४ देखि फागुन १० गतेसम्म पहिलो प्राथमिकताको पहिलो र दोस्रो चरणमा पहिलो मात्रा खोप लगाइएको थियो ।
