काठमाडौं, १५ चैत। मेलम्चीको पानी आजदेखि वितरण हुने भएको छ ।
काठमाडौँ उपत्यका खानेपानी लिमिटेडले पुरानै पाइपबाट मेलम्चीको पानी वितरण गर्ने तयारी गरेको हो ।
यसअघि शुक्रबारदेखि सुन्दरीजलबाट खानेपानी छोडिएको थियो । परीक्षण सफल भएपछि आयोजनाले धारा–धारामा पानी पठाउन लागेको हो ।
आज १० बजे पानी ट्यांकीमा आइपुग्ने र पानी वितरणका लागि खुमलटारको नयाँ ट्यांकीको पनि प्रयोग हुने भएको छ ।
पहिलो चरणमा चक्रपथभित्र र आसपासका झण्डै दुई लाख धाराका उपभोक्तालाई मेलम्चीको पानी वितरण गर्ने तयारी छ । हाल पुरानै पाइपलाइनका १ लाख ८० हजार धारामा पानी पठाइने र दुई चरणमा गरी १७ करोड लिटर पानी वितरण गरिने योजना रहेको छ ।
