सुनसरी,२३ पुष। झुटो विवरण पेस गरी धरानबाट नागरिकता लिएको आरोपमा एक महिला पक्राउ परेकी छन् । स्याङ्जाको वालिङ–३ स्थायी घर भएकी मञ्जु क्षेत्रीले धरान–९ को स्थायी बासिन्दा बनेर झुटो विवरण पेश गरी नागरिकता लिएको आरोपमा प्रहरीले पक्राउ गरेको हो ।
उनले २०७५ माघ ८ गते इलाका प्रशासन कार्यालय धरानबाट मञ्जु सेजुवालको नामबाट २० वर्ष उमेरको नागरिकता लिएको खुलेको छ । मञ्जुले २०५५ सालको जन्मदर्ता गरेर दुई बर्षअघि नागरिकता लिएकी थिइन् । उनले अर्खाखाचीको दिभर्ना १ का गोपाल सेजुवालाई नक्कली बाबु बनाई नागरिकता लिएको धरान प्रहरीले जनाएको छ । नक्कली बाबु बनेका सेजुवाल हाल जापानमा रहेको खुलेको छ ।
मञ्जुलाई जापान लानको लागि सेजुवाल २०७५ सालमा नेपाल आएर झुटो विवरण पेश गरी नागरिकता दिलाएर जापान फर्किसकेका छन् । झुटो विवरण सिफारिस गरेर नागरिकता दिलाउन सहयोग गर्ने धरान–९ का वडा अध्यक्ष रत्न कटुवाल फरार रहेको इलाका प्रहरी कार्यालय धरानका प्रमुख डिएसपी ज्ञानेन्द्र बस्नेतले जानकारी दिनुभयो ।
वडाध्यक्ष कट्वाल विरुद्ध जिल्ला अदालत सुनसरीबाट पक्राउ पुर्जी जारी गरिएको छ । अनुसन्धानबाट महिलाले धरानबाट नागरिकता लिएको खुलेपछि स्याङ्जा प्रहरीले पक्राउ परेकी महिलासहित यो मुद्धा धरान पठाएको हो ।
