एजेन्सी,२२ भदाै। बेलायतका प्रधानमन्त्री बोरिस जोन्सनले युरोपेली युनियन इयूसँग जारी वार्तामा आगामी अक्टोबर १५ भित्र ठोस प्रगति नभए ब्रेक्जिट वार्ताबाट अलग हुने चेतावनी दिनु भएको छ ।युरोपेली युनियनबाट बेलायतको बहिर्गमनका सन्दर्भमा युनियनसँग कुनै सम्झौता नभए पनि त्यो बेलायतका लागि फलदायी हुने प्रधानमन्त्री जोनसनको भनाई छ ।
केहीदिन यता बेलायती अधिकारीहरु र युरोपेली युनियनका वार्ताकारहरुबीच ब्रेक्जिटपछि बेलायत र युरोपेली युनियनबीचको व्यापार तथा अन्य विषयमा वार्ता भइरहेको छ । तर वार्तामा ठोस प्रगति भने हुन नसकेको अन्तर्राष्ट्रिय संचारमाध्यमले जनाएका छन् ।
दुबै पक्ष आ–आफ्ना अडानमा रहेकाले पनि वार्तामा प्रगति हुन नसकेको जनाइएको छ । प्रधानमन्त्री जोन्सनले युरोपेली वार्ताकारहरुले आफ्नो अडानमाथि पुनर्विचार नगरे बेलायतले युरोपेली युनियनसँग वार्ता गर्नुको कुनै अर्थ नहुने पनि बताउनुभएको छ । तर यूरोपेली युनियनले बेलायत वार्तामा गम्भीर नभएको आरोप लगाएको छ ।
बेलायत गत जनवरी ३१ मा युनियनबाट बाहिरिएको थियो । युनियनमा हाल २७ मुलुक सदस्य छन् ।राजनीतिक रुपमा ब्रेक्जिटमा सहमति भए पनि ११ महिनाको संक्रमणकाल अवधि आगामी डिसेम्बर ३१ मा समाप्त हुँदैछ । बेलायतले युरोपेली युिनयनले अनावश्यक शर्तहरु अघि सारेको पनि बताएको छ । बेलायत ब्रेजिक्टबाट बाहिरिएपनि केही प्रक्रिया भने बाँकी रहेका जनाइएको छ ।
