काठमाडौं, २२ बैशाख । सत्तारुढ नेकपामा आवद्ध विद्यार्थी संगठनहरुले विद्यार्थीलाई सहुलियत दरका खाना पकाउने ग्याँस उपलब्ध गराउने सहमति कार्यान्वयन गर्न सरकारलाई एक हप्ते अल्टिमेटम दिएका छन ।
आइतबार अनेरास्ववियू र अनेरास्ववियू (क्रान्तिकारी)ले विद्यार्थीहरुलाई सहुलियत दरमा खाना पकाउने ग्यास उपलब्ध गराउने विगतमा गरिएका सहमति कार्यान्वयन गर्न माग गर्दै नेपाल आयल निगमलाई एक हप्ते अल्टिमेटमसहितको ध्यानाकर्षण पत्र बुझाएका हुन् ।
विगतमा पटक–पटक गरिएका विद्यार्थीहरुलाई सहुलियत दरमा खाना पकाउने ग्याँस उपलब्ध गराउने सहमति कार्यान्वयनका लागि सरकारलाई एक हप्ते अल्टिमेटमसहितको ध्यानाकर्षण पत्र बुझाइएको अनेरास्ववियू (क्रान्तिकारी)का अध्यक्ष रञ्जित तामाङले जानकारी दिनु भयो । उहाँले एक हप्ता भित्र पनि आफूहरुको सो माग पूरा नभए सरकारविरुद्ध आन्दोलनमा जाने चेतावनी पनि दिनु भयो ।
यता,नेपाल आयल निगमका कार्यकारी निर्देशक सुरेन्द्र कुमार पौडेलले भने तत्काल विद्यार्थीहरुलाई सहुलियत दरमा खाना पकाउने ग्याँस उपलब्ध गराउने अवस्था नरहेको बताउनु भएको थियो । उहाँले विगतमा गरिएका सहमति हेर्ने र विद्यार्थीहरुको सोसम्बन्धि माग सम्बोधनका लागि आवश्यक छलफल गर्ने आश्वासन पनि दुवै विद्यार्थी संगठनका नेताहरुलाई दिनु भएको थियो ।
नेपाल आयल निगमले गत बिहीबार राति १२ बजेबाट लागू हुने गरी पेट्रोलमा प्रतिलिटर १ रुपैयाँ ५० पैसा र डिजेल तथा मट्टितेलमा १ रुपैँयाका दरले मूल्य वृद्धि गरेको थियो ।
