काठमाडौं, १९ जेठ । भारतका वर्तमान प्रधानमन्धी नरेन्द्र मोदी उनको दल, भारतीय जनता पार्टीको मात्र होइन, समग्र मुलुककै लोकप्रिय नेतामा गनिन्छन् ।
सत्ता सम्हालेको चारवर्षे अवधिमा मोदीले देशभित्र जनताले सोचेकै तहको उलटपुलट ल्याउन सकेका छैनन्, न त छिमेकी देशहरूसँग नै विश्वासिलो सम्बन्ध स्थापित गर्नसकेका छन्, तर उनको व्यक्तित्वको प्रशंसक घटेको देखिँदैन । अझ, विश्वप्रसिद्ध फोब्र्सको मूल्यांकनमा मोदी यो वर्ष विश्वकै शक्तिशाली व्यक्तिमध्ये नवौँ स्थानमा दर्ज हुन आइपुगेका छन् । यी विभिन्न आधारमा उनको राजनीतिक जीवन सफलतातर्फ नै उन्मुख देखिन्छ, तर उनको जिन्दगीको पारिवारिक पाटोलाई नियाल्ने हो भने, ठीक विपरीत स्थिति देखापर्छ ।
आफ्नो वैवाहिक सम्बन्ध र पारिवारिक अवस्थाबारे सधैँ मौनता साधेरै उनले समय व्यतीत गरिरहेका छन् । हुन त पारिवारिक अवस्था हरेक व्यक्तिका निजी मामिला हुन् र गोप्यताको अधिकार जो–कोहीसँग निहित हुन्छ नै, तर सार्वजनिक महत्वको भूमिकामा रहेकाको सिद्धान्त र व्यवहारप्रति आमचासो मुखरित हुनु अस्वाभाविक होइन । अझ, देशको शासन सञ्चालनको तहमा रहेका व्यक्तिहरूको जिन्दगीप्रति जिज्ञासु हुनेहरूको दायरा निकै फराकिलो हुन्छ ।
उनीहरूको आन्तरिक तथा बाह्य दुवै चरित्र आमजनता र समाजका लािग एउटा बेग्लै दृष्टान्त हुन्छ नै, अझ देशको जिम्मेवार तहमा बसेको व्यक्तिको अन्यायपूर्ण व्यवहारबाट कोही पीडित भइरहेको छ भने व्यक्तिको निजी मामिला र गोपनीयताको अधिकारभित्र मात्र त्यो सीमित हँुदैन, सोही अवस्थामा मोदी रहेका देखिन्छन्, त्यसैले कार्यकारी प्रमुख मोदीको रहस्यात्मक वैवाहिक जिन्दगीमाथि भारतमा थुप्रै बहस र टिप्पणी हुँदै आएको देखिन्छ।
मोदीको जीवनप्रति सामान्य जानकारी राख्ने जो–कोहीले पनि थाहा पाउने कुरा हो कि उनी विवाहित हुन्, तर श्रीमतीप्रतिको जिम्मेवारी उनले कहिल्यै पूरा गरेका छैनन् । १८ वर्षको उमेरमा घाँची संस्कृतिका सम्पूर्ण विधि पूरा गरेर सन् १९६८ मा १६ वर्षीया जशोदावेन चिमनलाल मोदीसँग उनको मागी विवाह भएको थियो ।
बिहेको करिब तीन महिना श्रीमतीसँगै बसेर हिन्दू आश्रमहरूको दुईवर्षे भ्रमणका लागि एक्लै घरबाट निक्लेका उनी त्यसपछि राष्ट्रिय स्वयंसेवक संघको प्रचारकका रूपमा क्रियाशील रहे । करिब तीन वर्षपछि घर फर्किए पनि त्यसलगत्तै आफन्तको क्यान्टिनमा काम गर्न एक्लै अहेमदाबाद हान्निएका मोदी त्यसपछि श्रीमतीसँग सम्पर्कविच्छेदकै अवस्थामा रहेको भारतीय सञ्चारमाध्यमबाट थाहा हुन्छ । पतिसँग बस्ने अवस्था नभएपछि जशोदाबेनले माइतीमै बसेर आफ्नो अध्ययनलाई अघि बढाइन् । पढाइपछि एक प्राथमिक स्कुलमा शिक्षिकाको कार्य शुभारम्भ गरेकी उनी निरन्तर शिक्षिकाकै रूपमा क्रियाशील हुँदै, हाल सोबाट निवृत्त भइसकेकी छन् ।
यो खबर आजको नागरिक दैनिकमा प्रकाशित छ ।
