पाण्डव पुजारा, २२ चैत कैलाली । कैलालीको टीकापुर नगरपालिका–७, सत्तीमा रहेको सामुदायीक सहकारी संस्थाको करिब साढे चार लाख रुपैयाँ लुटिएको छ । दिउँसो करिब ३ बजेतिर दुईवटा मोटरसाइकलमा आएको चारजनाको समूहले रकम लुटेको प्रहरीले जनाएको छ । रुमाल मुखमा बाँधेर आएकाहरुले सहकारीभित्र प्रवेश गरी पेस्तोल देखाएर सेफ खोल्न लगाइ रकम लगेका जनाइएको छ ।
रकम लिएर उनीहरु नेपाल भारत सीमातिर गएका सहकारी कर्मचारीको भनाइ उदृत गर्दै प्रहरीले जनाएको छ । सहकारीमा सेक्युरिटी गार्डको व्यवस्था थिएन । लुटेराहरुको हुलिया खुल्न सकेको छैन । लुटिएको खबर पाएपछि सीमा नाकामा कडाइ गरेको प्रहरीले जनाएको छ ।
