वासिंटन । अमेरिकी राष्ट्रपति डोनाल्ड ट्रम्पले जापानसँगको सम्बन्ध आफ्नो मुलुकका लागि शान्तिको आधारशिला रहेको बताउनुभएको छ ।
अमेरिका भ्रमणमा रहेका जपानका प्रधानमन्त्री सिन्जो आबेसँगको भेटमा राष्ट्रपति ट्रम्पले जापानको सुरक्षाप्रति आफु प्रतिबद्ध रहेको बताउनुभएको हो ।
दोस्रो बिश्वयुद्धपछि आर्थिक तथा बिकासका कार्यमा प्रतिस्पर्धी बनेको जापानका प्रधानमन्त्रीसँगको भेटलाई अमेरिकाले महत्वका साथ लिएको छ ।
भेटका क्रममा जापानी प्रधानमन्त्री आवेले दुई मुलुकको आर्थिक र ब्यापारिक सम्बन्धमा जोड दिनुभएको थियो ।
राष्ट्रपति ट्रम्पले जापानसँगको व्यापार घाटा कम गर्न कार निर्माता टोयोटा माथि करको दर बृद्धि गर्ने बताउँदै आउनुभएको छ ।
भेटपछि आयोजना गरिएको संयुक्त पत्रकार सम्मेलनमा राष्ट्रपति ट्रम्पले जापान महत्वपुर्ण र स्थिर सहयोगी रहेकाले द्वीपक्षीय सम्बन्ध बलियो बनाउन दृढ रहेको बताउनुभयो ।
प्रशान्त क्षेत्रको स्थिरताका लागी अमेरिकी सहयोग खोजी रहेको जापानका लागी चीनको बढ्दो प्रभाव टाउको दुखाईको विषय बनिरहेको बीबीसीले जनाएको छ ।
उत्तर कोरियाको अणविक परिक्षण र चीनको सैन्य शक्तिका कारण स्थिरताका लागी जापानले अमेरिकि सैन्य सहयोगको आशा गरेको अन्तराष्ट्रिय सञ्चारमाध्यमले जनाएका छन् ।
