एजेन्सी , ७ असार । अमेरिकी राष्ट्रपति डोनाल्ड ट्रम्पले भारत र चीनबीचको सीमा समस्या जटिल मोडमा पुगेको भन्दै आफूले ध्यान दिइरहेको बताउनुभएको छ । अमेरिकी राष्ट्रपति कार्यालय ह्वाइट हाउसमा संचारकर्मीसंगको कुराकानीमा ट्रम्पले भारत र चीनबीचको सीमा विवादका विषयमा दुबै मुलुकसंग अमेरिकाले कुराकानी गरिरहेको दाबी पनि गर्नुभएको जनाइएको छ ।
भारत र चीनको अवस्था जटील मोडमा पुगेको भन्दै ट्रम्पले त्यसमा अमेरिकाले सहयोगको प्रयास गरिरहेको समेत उल्लेख गर्नुभएको छ । दुबै देश आमने सामने भएको अवस्थामा त्यसप्रति अमेरिकाको ध्यान गएको ट्रम्पको भनाई छ ।
गत सोमबार राति लद्दाखको गलवान उपत्यकामा दुई देशका सेनाबीच भएको भिडन्तमा भारतका एक अधिकृतसहित २० सैनिक मारिएका थिए । चीनले आफूतर्फको हताहतीको कुनै जानकारी नदिए पनि भारतले भने चीनका ४० सैनिक मारिएको दाबी गर्दै आएको छ ।
ट्रम्पले दुवै देशलाई वार्ताका लागि सघाउन आफू तयार रहेको बताउनु भएको अन्तर्राष्ट्रिय संचारमाध्यमले जनाएका छन ।
