एजेन्सी, १३ जेठ
फ्रान्सको पहिलो श्रेणीको फुटबल क्लब लियोनका अध्यक्ष जिन मिसेल औलासले फ्रेन्च लिग वान फुटबल रद्द गर्ने निर्णयबारे पुनर्विचार गर्न सरकारसंग आग्रह गरेका छन् । अध्यक्ष जिनले फ्रान्सका प्रधानमन्त्री र खेलकुद मन्त्रीलाई पत्र लेख्दै सिजन चाँडै अन्त्य गर्ने निर्णयमा पुनर्विचार गर्न आग्रह गरेका हुन् ।
कोरोना भाईरसको महामारीको कारण गत अप्रिल २ मा फ्रेन्च लिग रद्द भएको घोषणा गरिएको थियो । लिग रद्द भएसँगै शीर्ष स्थानको पेरिस सेन्ट जर्मेन पीएसजी च्याम्पियन बनेको थियो ।
अध्यक्ष जिनले जर्मनीमा बुन्डेसलिगा मे १६ बाट शुरु भइसकेको तथा इंग्ल्याण्ड,स्पेन,इटाली,रुस र पोर्चुगलमा राष्ट्रिय लिग फुटबल सुचारु गर्न प्रशिक्षण थालिएको अवस्थामा फ्रान्समा चाँडो रद्द गरेर व्यवसायिक फुटबलको अवमूल्यन गर्न नहुने तर्क राखेका छन् ।
उनले फ्रेन्च लिग वान फुटबल रद्द गर्ने निर्णय पुनर्विचार गरेर जुन २ बाट प्रशिक्षण गर्न सकिने तथा जुलाई,अगष्टमा लिग सकाउन सकिने सुझाव पनि दिएका छन् । यस सिजनको लिग रद्द हुँदा लियोन सातौं स्थानमा रहेको थियो । जसको कारण लियोन युरोपियन छनोट खेल्न बन्चित भएको थियो ।
