दार्चुला, १८ वैशाख । लकडाउनका कारण महिना दिनभन्दा बढी समयदेखि भारतको सीमा क्षेत्रमा रहेका नेपालीलाई बिहीबारदेखि स्वदेश ल्याउन थालिएको छ । लामो क्वारेन्टाइन अवधि सकिएपनि उद्धार हुन नसकेका नेपालीहरु ल्याउने विषयमा बुधबार दुई देशका अधिकारीबीच सहमति भएपछि बिहीबार बिहानदेखि उद्धार सुरु गरिएको हो ।
दार्चुला, बैतडी, बझाङसहित १० जिल्लाका नेपालीहरुलाई भारतको धारचुला क्षेत्रबाट उद्धार गरिएको हो । नाका बन्द भएपछि रोकिएका नेपालीलाई दार्चुलाको सदरमुकामस्थित खलंगा र महाकाली नगरपालिका–९ दत्तु नाकाबाट उद्धार गरिएको हो ।
जिल्ला प्रशासन कार्यालय दार्चुलाका अनुसार बैतडी र बझाङका नागरिकलाई दत्तु नाका र दार्चुलासहित अन्य जिल्लाका भारतमा रहेका नेपाली नागरिकलाई खलंगा नाकाबाट उद्धार गरिएको छ ।
गत चैत १३ गतेदेखि भारत पिथौरागढको धारभुलाका पाँच क्वारेन्टाइनमा एक हजार ४० जना नेपाली एक महिनादेखि बसिरहेका थिए ।
