काठमाडौं, १६ माघ । साताको अन्तिम दिन बिहीबार शेयरबजार परिसूचक नेप्सेमा दोहोरो अंकको वृद्धि भएको छ । नेप्से १९ दशमलव ५१ अंकले बढेर परिसूचक १हजार ३ सय २५ दशमलव ३८ अंकमा पुगेको छ ।
१ सय ७८ कम्पनीको ४६ लाख २ हजार १ सय १ कित्ताशेयर १९ हजार ८ सय ७४ पटकको कारोबारबाट १ अर्ब ९६ करोड ६२ लाख १९ हजार ७ सय ४९ रुपैयाँमा खरिद बिक्री भएको छ ।
उक्त कारोबार रकम अघिल्लो दिनको भन्दा ६७ करोड बढी हो । बुधबार नेप्से ० दशमलव २७ को झिनो अंकले घट्दा १ सय ७६ कम्पनीका १ अर्ब २९ करोड ३७ लाख बढीको शेयर कारोबार भएको थियो ।
यसैगरी क वर्गका कम्पनीहरुको कारोबार मापन गर्ने सेन्सेटिभ इन्डेक्स ३दशमलव ५७ अंकले बढेर २सय ८१दशमलव ७६ अंकमा पुगेर बन्द भएको छ । बिहीबार व्यापार समूहबाहेक कारोबार भएका अन्य सबै समूहको परिसूचक उकालो लागेको छ ।
व्यापार समूहको परिसूचक १५दशमलव ३१ अंकले ओरालो लागेको हो । सूर्य लाइफ इन्स्योरेन्स कम्पनीको सबैभन्दा बढी ११ करोड ३६ लाख १९ हजार १ सय ४७ रुपैयाँको कारोबार भएको छ ।
एभरेष्ट इन्स्योरेन्स कम्पनीका लगानीकर्ताले सबैभन्दा बढी १० प्रतिशतले कमाउँदा हिमालय उर्जा विकास कम्पनीका लगानीकर्ताले सबैभन्दा बढी ५दशमलव ३५ प्रतिशतले गुमाएका छन् ।
