काठमाडौं, १७ भदौ । भाद्र शुक्ल पञ्चमीका दिनमा मनाइने ऋषि पञ्चमी पर्व अरुन्धतीसहित सप्त ऋषिको पूजा आराधना गरी मनाईएको छ ।
हरितालिका तीजको व्रत समापनका लागि यस दिन हिन्दु नारीहरुले गोदान, पूर्णपात्र लगायत धार्मिक कृत्य गरी नजिकको नदी वा पोखरीमा गई ३सय ६५ वटा दत्तिवनले दाँत माझ्ने, गाईको गोबर, माटो र खरानी लगाई स्नान गर्ने गर्दछन् ।
यसरी स्नान गरेपछि अरुन्धतीसहित अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रको पूजा गर्ने गरिन्छ । सप्त ऋषिको पूजा गर्ने पञ्चमी भएकैले यसलाई ऋषि पञ्चमी भन्ने गरिएको हो ।
