प्रदेश ३द्वारा सुदूरपश्चिम प्रदेश ६ विकेटले पराजित
काठमाडौं, २० जेठ । प्रदेश नम्बर ३ राजधानीमा जारी प्रधानमन्त्री कप एक दिवसीय पुरुष क्रिकेट प्रतियोगिताको सेमिफाइनलमा प्रबेश गरेको छ । नेपाली राष्ट्रिय टोलीका कप्तान पारस खड्का रहेको प्रदेश नम्बर ३ ले सोमवार भएको खेलमा सुदूरपश्चिम प्रदेशलाई ६ विकेटले पराजित गर्दै सेमिफाइनलमा प्रबेश गरेको हो ।
मुलपानी क्रिकेट मैदानमा सुदूरपश्चिमले दिएको १सय ५५ रनको सामान्य लक्ष्य प्रदेश ३ ले ३३ ओभर २ बलमा मात्र ४ विकेट गुमाएर पुरा गर्यो । टस जितेर पहिले ब्याटिङ गरेको सुदूरपश्चिमले ४५ ओभर १ बलमा अलआउट हुँदै १सय ५४ रन बनाएको थियो ।
जितसंगै समूह ’ए’ को प्रदेश ३ ले ४ खेलबाट ६ अंक जोड्यो । यस समूहबाट ६ अंक नै जोडेको शसस्त्र प्रहरीको एपीएफ क्लव सेमिफाइनलमा पुगिसकेको छ ।
