काठमाडौं, १३ जेठ । इटालियन च्याम्पियन युभेन्टस, सिरी ए फुटलब अन्तर्गत यो सिजनको अन्तिम खेलमा पराजित भयको छ ।
लिगका केही खेल बाँकी हुँदै उपाधि जितेको युभेन्टस आइतबार राति भएको यो सिजनको अन्तिम खेलमा साम्पाडोरिएसँग २–० ले पराजित भएको हो । घरेलु मैदानमा भएको खेलमा साम्पाडोरिएका लागि ग्रेगोइरे फेफ्रेलले ८४ औँ तथा जिएन्लुका काप्रारीले इन्जुरी समयको पहिलो मिनेटमा गोल गरेका हुन् । क्रिष्टियानो रोनाल्डोलाई आराम दिइएको खेलमा युभेन्टस पराजित भएको हो । प्रशिक्षक मासिमिलियानो एलेग्रीले अन्तिम खेलमा हार तथा लिग उपाधिसहित युभेन्टससँगको यात्रा टुंग्याएका छन् ।
उनले यो सिजनको अन्त्यसँगै क्लब छोड्ने बताएका थिए । विगत पाँच वर्षमा उनले हरेक वर्ष सिरी ए र चार पटक कोपा इटालियाको उपाधि जिते । लिगका पाँच खेल अघि नै उपाधि पक्का गरेको युभेन्टसको ३८ खेलबाट ९० अंक भयो । यो सिजन उसले लिगमा २८ खेल जित्यो, ६ खेलमा बराबरी तथा चार खेलमा परातिज भयो ।
