भक्तपुर, १७ बैशाख । जुम्ल्याहा दुई बालिकालाई गेष्ट हाउसमा लगेर बलात्कार गरेको अभियोगमा प्रहरीले दुई जनालाई पक्राउ गरेको छ ।
पक्राउ पर्नेमा भक्तपुर नगरपालिका–१० मूलढोका बस्ने २६ वर्षीय सुनिल शिल्पकार र काभ्र्र्रे रोसी गाउँपालिका–७ घर भई हाल भक्तपुर कमल विनायक बस्ने १८ वर्षीय विशाल तामाङलाई प्रहरीले १४ गते राति नै पक्राउ गरेको महानगरीय प्रहरी परिषर भक्तपुरका प्रहरी उपरीक्षक हिमालयकुमार श्रेष्ठले जानकारी दिए ।
भक्तपुर–१ इपाखेमा डेरा गरी बस्ने रामेछाप उमाकुण्ड गाउँपालिका–९ बुङ्देल घरभएका १५ वर्षीया जुम्ल्याहा दुई बालिकालाई यही वैशाख १३ गते ललाइफकाई कमलविनायकको फेमिली गेष्ट हाउसमा लगेर बलात्कार गरेको किटानी जाहेरीका आधारमा वैशाख १४ गते राति दुवैलाई गिरफ्तार गरेको हो । यो समाचार आजको हिमालय टाइम्स दैनिकमा लेखेको छ ।
अघिल्लो दिन दिउँसो घरबाट दुई छोरी हराएको भन्दै बैशाख १४ गते साँझ बालिकाका आमाले महानगरीय प्रहरी परिसरमा उजुरी दिएपछि खोजतलासका क्रममा सोही दिन राति ९ बजे आरोपितलाई गिरफ्तार गरेको श्रेष्ठले बताए । पक्राउपछि आइतबार बालिकाका आमाले किटानी जाहेरी दिएको र पक्राउ परेकालाई आवश्यक अनुसन्धान गरिरहेको प्रहरीले जनाएको छ ।
