काठमाडौं, १० फागुन । काठमाडौंको भृकुटीमण्डपमा खाद्य मेला सुरु भएको छ । खाद्य प्रविधि तथा गुण नियन्त्रण विभागको आयोजनामा शुक्रबाट खाद्य मेला सुरु भएको हो ।
परम्परागत पोषिला र स्थानीय खाद्य पदार्थको प्रवर्द्धन गरौ, असल पोषणका लागि खानेबानीमा सुधार गरौ भन्ने मूला नाराका साथ तीन दिने मेला सुरु भएको छ । मेलाको उद्घाटन कृषि, भूमि व्यवस्था तथा सहकारी सचिव युवकध्वज जिसीले गरेका छन् ।
खासगरी पछिल्लो पटक पौष्टिक र गुणस्तरीय खानाको कमीले पुड्कोपन, ख्याउटे, कम तौल र कुपोषण जस्ता रोगहरु लाग्ने गरेका छन् । त्यस्ता रोगव्याधी तथा समस्या आउन नदिन शुरक्षित पौष्टिक आहार र खानेबानीमा सुधार ल्याउन सरकारी स्तरबाट हरेक बर्ष खाद्य विभागले खाद्य मेला गर्दै आएको विभागका महानिर्देश सन्जीव कर्णले जानकारी दिए।
तीन दिने मेलामा करिब ७५ वटा स्टल राखिएका छन् । ती स्टलमा विभिन्न जातजातिका परम्परागत परिकार र विभिन्न उद्योगबाट उत्पादित वस्तु राखिएका छन् । स्थानीय उत्पादनलाई स्थान दिइएको भन्दै अवलोकनकर्ताहरुले खुशी ब्यक्त गरेका छन् ।
मेलाबाट धेरै स्थानीय उत्पादन र परिकारबारे जानकारी लिन पाएको अवलोकनकर्ताहरुले बताएका छन् । विभागले स्थानीय उत्पादनको प्रवर्द्धनका लागि भन्दै काठमाडौं वाहिरका सहरमा पनि खाद्य मेला गर्ने गरेको छ ।
विभागले यो मेलामा सहभागी हुने स्टललाई खाद्य उद्योग, खाद्य सम्बन्धी प्रदर्शनी तथा खाद्य परिकार समूह गरी तीन विधामा प्रथम, दुईतीय, तृतीय र सान्तवना स्थान प्राप्त गर्नेलाई नगद पुरस्कार तथा प्रमाणपत्र प्रदान गर्ने छ ।
