काठमाडौं, ६ फागुन । संवैधानिक परिषदले निर्वाचन आयोगको पदाधिकारी नियुक्ति सिफारिस सम्बन्धी छलफल सुरु गरेको छ । संवैधानिक परिषदको सोमबार अपरान्ह बसेको बैठकले निर्वाचन आयोगको प्रमुख निर्वाचन आयुक्त तथा आयुक्तहरुको नियुक्ति सिफारिसका विषयमा छलफल थालेको हो ।
प्रमुख निर्वाचन आयुक्त र आयुक्तहरुको नियुक्ति सिफारिसबारे आगामी फागुन १२ गते बस्ने अर्को बैठकले टुंगो लगाउने गरी छलफल गरिएको परिषद सदस्यसमेत रहेका राष्ट्रिय सभाका अध्यक्ष गणेशप्रसाद तिमिल्सिनाले जानकारी दिए ।
बैठकमा राष्ट्रिय प्राकृतिक स्रोत तथा वित्त आयोग, राष्ट्रिय समावेशी आयोग, मधेशी आयोग, थारु आयोग र मुस्लिम आयोगको सदस्यहरुको सिफारिसका विषयमा पनि छलफल गरिएको थियो ।
परिषदको गत माघ छ गते बसेको बैठकले ती आयोगहरुको प्रमुख सिफारिस गरेपनि सदस्यहरुबारे भने छलफल गरिएको थिएन । त्यसको नियुक्तीका लागि सिफारिस गर्ने विषयमा पनि छलफल गरिएको अध्यक्ष तिमिल्सिनाले बताए ।
संवैधानिक व्यवस्था अनुसार संवैधानिक परिषदले संवैधानिक आयोगको नियुक्तिका लागि गरेको सिफारिस संसदीय सुनुवाई विशेष समितिले अनुमोदन गरेपछि राष्ट्रपतिले नियुक्त गर्नुपर्ने हुन्छ ।
