नेपाल आयल निगम लिमिटेडका पूर्वकार्यकारी निर्देशक गोपालबहादुर खड्का विरुद्ध विशेष अदालतमा मुद्दा दायर भएको छ । अख्तियार दुरुपयोग अनुसन्धान आयोगले खड्कासहित चारजना विरुद्ध अकुत सम्पति आर्जन गरेको अभियोगमा मुद्दा दायर गरेको हो ।
खड्कासहित श्रीमती शर्मिला खड्का, अनिता लामा र सिजी डेभलर्पस फुड प्रा.लि.विरुद्ध १८ करोड ६६ लाख ५ हजार रुपैयाँ बराबरको अवैध सम्पत्ति आर्जन गरेको अभियोग लगाएको अख्तियारका प्रवक्ता रमेश्वर दंगालले जानकारी दिए ।
अख्तियारले खड्कासहित चारै जनालाई दुई वर्षसम्म कैद सजाय, विगो बमोजिम जरिवाना तथा विगो भाराउन माग गरेको छ । उनीहरुले गैरकानुनी सम्पत्ति आर्जन गरी अमिल्दो र अस्वभाविक जीवनयापन गरेको दावी अभियोगपत्रमा छ ।
यता खड्का नेपाल आयल निगमको कार्यकारी निर्देशक रहँदा सातै प्रदेशमा इन्धन भण्डारणको लागि गरेको जग्गा खरिदमा अर्बौं बराबरको भ्रष्टाचार गरेको आरोप लागेको थियो । खड्कालाई २०७१ माघ १४ गते मन्त्रिपरिषद निगमको कार्यकारी निर्देशकमा नियुक्त गरेको थियो ।
